ЭЛЧИН САЙД Ц.МӨНХ-ӨЛЗИЙ ИТГЭМЖЛЭХ ЖУУХ БИЧГЭЭ БАРИВ

Монгол Улсаас  Бүгд Найрамдах Финланд Улсад суух Онц бөгөөд Бүрэн эрхт Элчин сайд Ц.Мөнх-Өлзий Бүгд Найрамдах Финланд Улсын Ерөнхийлөгч Эрхэмсэг ноён Александр Штубб-т 2025 оны 4 дүгээр сарын 1-ний өдөр Итгэмжлэх жуух бичгээ барив.

Элчин сайд Ц.Мөнх-Өлзий Ерөнхийлөгч Александр Штубб-т Итгэмжлэх жуух бичгээ барих үеэр Монгол Улсын Ерөнхийлөгч У.Хүрэлсүхийн мэндчилгээг уламжилж, Монгол, Финландын найрсаг харилцаа, хамтын ажиллагаа нийтлэг үнэт зүйлсдээ тулгуурлан амжилттай хөгжиж буйг тэмдэглэв. Түүнчлэн хоёр талын харилцаа, хамтын ажиллагааг идэвхжүүлэхэд дээд, өндөр түвшний харилцан айлчлал чухал ач холбогдолтойг дурдаад, Эрхэмсэг ноён Ерөнхийлөгч Монгол оронд айлчлах урилгатайг дахин нотолж, монголын тал айлчлалыг хэрэгжүүлэхийн төлөө буйг илэрхийлэв.  

 Ерөнхийлөгч Александр Штубб Элчин сайд Ц.Мөнх-Өлзийг үүрэгт ажилдаа орж буйд нь баяр хүргэж амжилт хүсээд, хоёр талын харилцаа, хамтын ажиллагааг өргөжүүлэн хөгжүүлэхэд дэмжиж ажиллахаа илэрхийлээд, Монгол Улсад боломжтой хугацаанд айлчлах сонирхолтой байгаагаа нотлов.