Гэмт хэрэгт холбогдон иргэн саатуулагдсан тохиолдолд
2023-11-29
Гэмт хэрэгт холбогдон иргэн саатуулагдсан тохиолдолд
Асуулт: Гэр бүлийн гишүүнийг хэрхэн эрэн сурвалжлуулах вэ?
Хариулт: Гэр бүлийн гишүүд нь Швед Улсад байгаа, холбоо тогтоох боломжгүй тохиолдолд Элчин сайдын яам /ЭСЯ/-нд хандан өргөдөл гаргана. ЭСЯ-наас Цагдаагийн газарт хүсэлт гарган мэдээлэл авч өгнө.
Гэр бүлийн гишүүд нь Монгол Улсад байгаа тохиолдолд Гадаад харилцааны яамны Консулын газарт өргөдөл гаргана. Консулын газраас ЭСЯ-нд мэдээлж, ЭСЯ Цагдаагийн газарт хүсэлт гарган мэдээлэл авч өгнө.
Асуулт: Эрэн сурвалжилж байгаа хүн хэрэг, зөрчилд холбогдон цагдаад саатуулагдсан бол хэрхэн холбогдох вэ?
Хариулт: Саатуулсан Цагдаагийн газрын хаягийг мэдэх бол холбоо барих хүсэлтээ шууд гаргаж болно. Хаана саатуулагдаж байгааг мэдэхгүй тохиолдолд ЭСЯ-нд хандан өргөдөл гаргана. ЭСЯ-наас Цагдаагийн газарт хүсэлт гарган, мэдээлэл авч өгнө.
Асуулт: Хэрэг, зөрчилд холбогдоод саатуулагдсан хүний талаар Цагдаагийн газраас мэдээлэл өгөхгүй байна.
Хариулт: Холбогдсон хэрэг, зөрчлийн зүйл анги, хүнд, ноцтой эсэхээс шалтгаалан саатуулагдсан хүний ЭСЯ болон бусад хүмүүстэй холбоо барих эрхийг Прокурорын саналаар Шүүх хасаж болно. Тухайлбал, хүнд, ноцтой гэмт хэрэгт сэжиглэгдсэн иргэн саатуулагдах хугацаанд бусадтай холбоо барих эрхгүй бөгөөд цагдаагийн газраас мөн мэдээлэл өгөхгүй. Чингэхдээ хэдий хүртэл хугацаанд саатуулагдах талаар ерөнхий мэдээлэл авч болно.
Хэрэг, зөрчлийн зүйл анги хөнгөн тохиолдолд Цагдаагийн газраас байцаалт, мэдүүлэг авах үед ЭСЯ-тайгаа холбоо барих эсэхийг асууна. ЭСЯ-тайгаа холбоо барих хүсэлтээ өгвөл ЭСЯ-тай утсаар яриулна.
Асуулт: Хэрэг, зөрчилд холбогдоод саатуулагдсан хүнтэй ЭСЯ-аар дамжуулан утсаар ярьж болох уу?
Хариулт: Хэрэг, зөрчилд холбогдон саатуулагдсан иргэн ЭСЯ-тай утсаар ярих эрхтэй боловч ЭСЯ тухайн дуудлагыг бусадтай холбох боломжгүй. Иргэний зөвшөөрлөөр мэдээлэл авч, гэр бүлийн гишүүдэд нь мэдээлэл дамжуулах боломжтой.
Асуулт: Шүүх хуралд оролцоход өмгөөлөгчийн төлбөрийг хаанаас гаргах вэ?
Хариулт: Хэрэг, зөрчилд холбогдсон иргэнийг шүүх хуралд Швед Улсаас өмгөөлөгч үнэгүй гаргаж өгнө.
Асуулт: Шүүх хуралд ЭСЯ-наас орох уу?
Хариулт: Шведийн Шүүхээс шүүх хуралдаанд ЭСЯ-наас төлөөлөл оролцуулахыг зөвшөөрдөггүй.
Асуулт: Шүүх хуралд ЭСЯ-наас орчуулагч гаргаж өгөх үү?
Хариулт: Шведийн Цагдаагийн газар, Шүүх байгууллагаас Швед Улсад орчуулга хийх эрх бүхий орчуулагчдаар орчуулга хийлгэхийг зөвшөөрдөг тул ЭСЯ-наас орчуулагч гаргахыг зөвшөөрдөггүй.
Асуулт: Шүүх хурлын талаарх мэдээллийг хэрхэн авах вэ?
Хариулт: Шүүх хурлын шийдвэр шүүх хурал болсноос 14 хоногийн дараа гарч, тухайн Дүүргийн шүүх хурлын цахим порталд 5 жил нийтэд нээлттэй байна.[1]
Шведийн Шүүхийн нэгдсэн цахим портал https://www.domstol.se/tjanster-och-blanketter/saker-e-post/ -аас хэргийн дугаараар шүүх хурлын тэмдэглэлийг цахимаар болон шуудангаар авах боломжтой.
Мэдээлэл хүсэхэд саатуулагдсан иргэний хэргийг хэлэлцсэн анхан шатны шүүх /Tingsrätt/, B эсхүл Т үсгээр эхлэх 5 оронтой хэргийн дугаар, мэдээлэл хүсэж буй иргэний шведийн бүртгэлийн дугаар /personnummer/, цахим шуудан, утасны дугаарыг шаардана.
Шүүх хурлын тэмдэглэл хүссэн талаарх мэдээлэл нийтэд ил байна.
Асуулт: Шүүх хурлын шийдвэрийг хэрхэн давж заалдах вэ?
Хариулт: Шүүх хурлын шийдвэр гарснаас хойш 3 долоо хоногийн дотор давж заалдах эсэх хүсэлтээ өмгөөлөгчөөрөө дамжуулан гаргах эрхтэй.
Асуулт: Хорих ял шийтгүүлсэн хүн суллагдаад Шведэд үлдэж болох уу?
Хариулт: Швед Улсад ял эдлэхээр шүүн таслуулсан хүн Швед Улсын давхар харьяалалгүй, Швед Улсад үлдэх гэр бүлийн хэлхээ холбоо байхгүй
[1] Хүнд, ноцтой гэмт хэрэг, хүүхдийн эсрэг гэмт хэргийг хаалттай хэлэлцсэн тохиолдолд шүүх хурлын тэмдэглэлд орохгүй, хаалттай хэлэлцсэн талаар тэмдэглэлд тусгана.
тохиолдолд 2 жил болон түүнээс дээш хугацаагаар Швед Улсад эргэн орох эрхээ хасуулж, хилийн хориг /хар тамга/ тавиулна. Ноцтой гэмт хэрэгт яллагдаж, ял эдэлсэн этгээдийн Швед Улсад эргэн ирэх эрхийг нь бүх насаар нь хасдаг.
Асуулт: Хоригдсон, саатуулагдсан хүнтэй ЭСЯ-аар дамжуулахгүй хэрхэн холбоо барих вэ?
Хариулт: Хоригдож байгаа, саатуулагдсан хүнтэй утсаар ярих, захидлаар харилцах боломжтой. Дуудлага хийх хүсэлтийг зөвхөн хоригдож байгаа хүн гаргах ба гаднаас дуудлага хүлээн авах боломжгүй.
Хоригдож байгаа, саатуулагдсан иргэн өөрөө утсаар ярих хүсэлтээ гаргана. Швед Улсад байгаа ар гэр, найз нөхөдтэйгээ холбоо барих хүсэлтэй бол утсаар ярих хүний овог нэр, Шведийн бүртгэлийн дугаар /personnummer/, утасны дугаар бүхий хүсэлтийг хорих ангийн захиргаанд бичгээр гаргана. Гар утасны дугаар нь тухайн хүний өөрийнх нь нэр дээр байх шаардлагатай.
Швед Улсаас өөр улсад байгаа хүнтэй утсаар ярих хүсэлт гаргахад тухайн иргэний ял шийтгэл хүлээж байсан эсэх тухай суугаа улсын Цагдаагийн газрын тодорхойлолт, тухайн утасны дугаарыг өөрөө эзэмшдэг эсэх талаарх албан ёсны тодорхойлолт, паспорт, иргэний үнэмлэхний хуулбар шаардлагатай.
Асуулт: Өөрийн холбогдох мэдээллийг өгч, дуудлага хүлээн авах зөвшөөрлөө өгсөн ч утсаар ярьж чадахгүй байна?
Хариулт: Шведийн Хорих ангиудын нэгдсэн төвийн 072288800 дугаараас дуудлага ирэх бөгөөд дуудлага хүлээн авах бол # товчлуурыг дарж ярина. Дарахгүй тохиолдолд дуудлага автоматаар тасарна.
Дараах тохиололд дүрст дуудлага хийх боломжтой байдаг. Үүнд:
- Бага насны хүүхэдтэйгээ
- Харааны болон сонсголын бэрхшээлтэй иргэнтэй ярих.
Асуулт: Утсаар ярих боломжгүй бол хэрхэн холбогдох вэ?
Хариулт: Утсаар ярих боломжгүй тохиолдолд захидлаар харилцах боломжтой.
Хорих анги, саатуулах төвүүдийн шуудангийн хаягийг https://www.kriminalvarden.se/kontakt/hitta-och-kontakta/ холбоосоор орж, тухайн хаягаар захидал илгээж болно. Таны захидалыг хоригдож байгаа хүнд танилцуулж, зөвшөөрсөн тохиолдолд захидлыг өгнө. Захидал хүлээн авахаас татгалзсан тохиолдолд тухайн захидлыг суллагдах хүртэл хорих ангийн захиргаанд хадгалж, суллагдах үед нь өгнө.
Хоригдож байгаа газрын талаар мэдээлэл байхгүй бол захидлаа дугтуйлан тухайн иргэний овог нэр, Шведийн бүртгэлийн дугаар /personnummer/-ыг бүтнээр бичин хаяглана. Эл дугтуйгаа дахин дугтуйнд хийж Prison Service, The Journal Archive, 601 80 Norrköping хаягаар хүргүүлнэ.
Асуулт: Хоригдож байгаа, саатуулагдсан хүн хариу захидал бичих эрхтэй юу?
Хариулт: Хүнд, ноцтой хэрэг, зөрчилд холбогдсоноос бусад тохиолдолд захидал хүлээн авах, хариу захидал бичих эрхтэй. Хорих газраас захидал илгээхэд шуудангийн марк шаардлагатай байдаг тул захидалдаа шуудангийн марк хавсарган явуулж болно.
Асуулт: Шуудангаар захидлаас өөр зүйл илгээж болох уу?
Хариулт: Шуудангаар ном, сэтгүүл, хэвлэмэл материалаас өөр зүйл илгээхийг хориглоно.
Асуулт: Хоригдож байгаа хүнийг хэрхэн эргэх вэ?
Хариулт: Хорих анги, саатуулах төвүүдийн эргэлтийн цагийн хуваарийг https://www.kriminalvarden.se/kontakt/hitta-och-kontakta/ холбоосоор харж, урьдчилан хорих анги, саатуулах төвтэй утсаар эсхүл цахимаар эргэх хүсэлтээ гаргана.
Хорих ангиас эргэх хүсэлтийг зөвшөөрсөн тохиолдолд эргэлтээр очих хүн өөрийн албан ёсны бичиг баримтаа биедээ авч очно.
Эргэлтээр очихдоо ном, сонин, сэтгүүл зэргийг үлдээх боломжтой бөгөөд чингэхдээ хорих ангиас урьдчилж зөвшөөрөл авсан байна.
Асуулт: Хоригдож байгаа хүнд мөнгө, хүнсний бүтээгдэхүүн илгээж болох уу?
Хариулт: Хоригдож байгаа хүнд гаднаас мөнгө, хоол хүнс өгөхийг хориглоно. Ял эдэлж байхдаа хөдөлмөр эрхэлж, сургалтад хамрагдвал цагийн 17 швед кроны цалин авна. Хөдөлмөр эрхэлдэггүй, сургалтад хамрагдахгүй ч, долоо хоногийн 100 швед кроны авдаг.